በሳዑዲ አረቢያ የደረሰው ግፍና መሠረታዊ ችግራችን

በሳዑዲ አረቢያ የደረሰው ግፍና መሠረታዊ ችግራችን
ሕዳር ፱ ቀን ፳ ፻ ፮ ዓመተ ምህረት
November 18, 2013

ዘግናኙ የስደተኛ ኢትዮጵያዊያን ግፍ በሳዑዲ አረቢያዊያን እጅ፤ ከፊታችን ተደቅኗል። ሁላችን በያለንበት፤ “ለምን? ምን አደረግን? መጨረሻው ምንድን ነው? መቼ ነው ይኼ ሁሉ የሚያበቃው?” እያልን እርስ በርሳችን እየተጠያየቅን ነው። እኛ ወደ የምንፈልገው መንገድ ካልገባን፤ ሌላ ሊይስገባን የሚችል ኃይል የትም የለም። በሳዑዲ አረቢያ የተደረገውን ኢሰብዓዊ ድርጊት፤ ሁላችን ኢትዮጵያዊያን በግል በራሷና በራሱ እንደተደረገ በደል አድርገን ወሰደነዋል። ተገቢም ነው። ኢትዮጵያዊያን እንደ ትቢያ ተረገጥን፣ ተዋረድን፣ ተገደልን። እናም አንድ ነገር ማድረግ አለብን። ሀገራዊ መልስ ሠጪ መንግሥት የለንም፤ ሀገራችንን የሚወክል መንግሥት የለንምና። እኛ ግን በኢትዮጵያዊነታችን ኢትዮጵያዊ ኃላፊነት አለብን። ኃላፊነታችን እስከምን ድረስ ነው? እና ምን መደረግ አለበት? የሚሉትን ሁለት ጥያቄዎች በዚህ ጽሑፍ እቃኛለሁ።
በሳዑዲ አረቢያ የተደረገውን፤ የሳዑዲ አረቢያ መንግሥትና በኢትዮጵያ ያለው ወገንተኛ አምባገነን ሕገ ወጥ መንግሥት ባንድነት ሆነው የፈፀሙት ነው። ጥርጣሬ ያለው ካለ፤ በአዲስ አበባ ተቃውሞ ለማሰማት የወጡትን ወገን አፍቃሪና ሀገር ወዳድ ኢትዮጵያዊያን ላይ፤ ወገንተኛው አምባገነን ሕገ ወጥ መንግሥት ያደረገውን መገንዘብ ይቻላል። ሀገራችን ለገጠማት አስቸጋሪ ሁኔታ ተጠያቂው ወገንተኛው አምባገነኑ ሕገወጥ መንግሥት ነው። በሳዑዲ ልዑላዊያንና በወገንተኛው አምባገነን ሕገወጥ ገዥዎቻችን መካከል ስላለው ወዳጅነት እያንዳንዳችን በደንብ ማወቅ አለብን። ይኼ አዲስ አበባ ያለው መንግሥት ከኢትዮጵያዊያን ይልቅ ለሳዑዲ ልዑላዊያን ለምን ቆመ?
ይኼ በሳዑዲ አረቢያ የተደረገውና በመደረግ ላይ ያለው ኢትዮጵያዊያንን የማጥቃትና የማጥፋት ጉዳይ፤ ብቻውን የቆመና ብቻውን የሚፈታ አይደለም። አዎ ለሰላማዊ ሠልፍ እንውጣ፣ እንጩህ፣ ለዕርዳታ እንነሳ፤ የማታ ማታ ግን፤ አሁንም መሠረታዊው የኢትዮጵያዊያን ችግር፤ የራሳችን የአስተዳደር ችግር ነው። ይህ ደግሞ ወገንተኛ አንባገነኑ ሕገወጥ መንግሥት፤ በባለቤትነት የሚበላው ምግብ፣ የሚጠጣው ወሃ፤ ሥጋና ደሙ፤ አጥንትና ቆዳው ነው። ይህ መንግሥት እስካለ ድረስ፤ በተለያዬ መልክ እንዲህ ያሉ ተግባራት ይቀጥላሉ። እናም ዋናው ትኩረታችን ይኼን ሕገወጥ መንግሥት ማስወገድ መሆን አለበት። ይኼ ሕገወጥ መንግሥት የሚፈጥረውን እያንዳንዱን አጋጣሚ በደንብ መጠቀሙ የኛ ግዴታ ነው። እናም ይኼን የሳዑዲ አረቢያ ግፍ፤ ከዋናው ትኩረታችን ጋር ማስተሳሰር አለብን። ሰዎች እየተገደሉ ነው፤ በሀገር ቤትም በውጭም።
መነሳት ያለብን፤ ኢትዮጵያዊያን በያለንበት ምንድን ነው እየጠየቅን ያለነው? ከሚለው ነው። ኢትዮጵያዊያን ባሁኑ ሰዓት እየጠየቅን ያለነው የሞትና የሽረት ጉዳይ የሆነብንን የወገንተኛው አምባገነን ሕገወጥ መንግሥት መወገድና የኢትዮጵያዊያንን ጥቅምና ፍላጎት የሚያስቀድም መንግሥት መቋቋምን ነው። ባሁኑ ሰዓት በኢትዮጵያ ውስጥ ያለውን ወገንተኛ አምባገነን ሕገወጥ መንግሥት እንዲወገድ የምንፈልገው፤ ይህ መንግሥት ፀረ ኢትዮጵያና ፀረ ኢትዮጵያዊነት ስለሆነ፣ ሀገሪቱን እያወደመና ሕዝቡን እየጨረሰ ስለሆነ፣ የሀገሪቱን ሀብት በመዝረፍ ባዶ ስላስቀራት፣ ኢትዮጵያዊያን እርስ በርሳችን እንድንጫረስ እያባላን ስለሆነና ለነገው ምፅዓት ከእግራችን ሥር ፈንጅ ስለጠመደብን ነው። ካገር ውስጥ አልፎ በየተሰደድንበት ሀገሮች ሁሉ ተከትሎ፤ እጁን ሠዶ እያሰቃየን ነው። እናም ባሁኑ ሰዓት በኢትዮጵያ ያለው ዋናው ቅራኔ፤ በኢትዮጵያዊያን እና በወገንተኛው አምባገነን ሕገወጥ መንግሥት መካከል ያለው የመኖርና ያለመኖር ጉዳይ ነው።
ይኼ ዋና ማሠሪያውና መግቢያ በሩ ሆኖ፤ ከዚህ እንዲከተል የምንፈልገው ምንድን ነው? ባሁኑ ሰዓት ኢትዮጵያዊያን በያለንበት በሀገራችን እንዲሆን የምንፈልገው፤
ሀ) ኢትዮጵያዊያን አንድነታችን የተጠበቀበት፣
ለ) ሀገራችን ኢትዮጵያ ዳር ድንበሯ የተከበረበት፣
ሐ) የሕግ የበላይነት በሀገራችን የሠፈነበትና፣
መ) የያንዳንዳችን ኢትዮጵያዊያን ሰብዓዊና ዴሞክራሲያዊ መብቶች የተከበሩባት ሀገር እንድትሆን ነው።
ለኛ፤ የመጨረሻው ያማረ እንዲሆን ለምንፈልግ ሁሉ፤ በሀገርና በድርጅት መካከል ያለው ውዥንብር መገፈፍና መገለጥ አለበት። ባሁኑ ሰዓት አጀንዳችን ወገንን ማትረፍና ሀገር ማዳን ነው። ለዚህ የአንተ ወይም የአንቺ ድርጅት የተለዬ ተልዕኮ የለበትም። የተደራጁትም ሆነ ያልተደራጁት እኩል ተቆርቋሪነት አለብን እና ኃላፊነት አለብን። የኔ ድርጅት ከሁሉ በላይ ነው የሚለውን፤ ቦታ ማሣጣት አለብን። ሀገራችን ከማንኛችንም ድርጅት በላይ ነች። ሁላችንም አንድ ላይ አንድ ተልዕኮ ነው ያለን። ታዲያ የድርጅታችሁን ጋጋታ ለኋላ አቆዩትና በአንድ ላይ በዚህ አጀንዳ ዙሪያና አጀንዳው በሚጠይቀው የአደረጃጃት ጥሪ እንሰባሰብ። ይህ የሳዑዲ አረቢያ ግፍ ለዚህ ልባችንን ይክፈተው።
የምንሠለፈው በኢትዮጵያዊነታችን ብቻ መሆን አለበት። በደላችን በኢትዮጵያዊነታችን ነው። መፍትሔውም በኢትዮጵያዊነታችን መምጣት አለበት። የሀገሪቱ ዜጎች በሙሉ በአንድ ተነስተን፤ የሀገሪቱ ተወላጅ በሙሉ እኩል የምንሳተፍበት የፖለቲካ ምኅዳር ለመፍጠር መሆን አለበት። በዚህ ላይ ስምነት ከሌለን፤ የነገው ሕልውናችን አስፈሪ ነው። በየክልላችን ተሰልፈን፣ በተለይ የፖለቲካ ማስተማመኛ ሳይኖር፣ ይኼ ወገንተኛ አምባገነን ሕገወጥ መንግሥት ትቶልን የሚሄደውን መርዛማ ውርስ አቅፈን፣ የትድበሰበሰ ስምምነት ፈጥረን ፖለቲካውን የተላበስነው እንደሆነ፤ ለጊዜው ብንሰነብት እንኳን፤ እያንዳንዱ ፖለቲከኛ ሲያኮርፍ ወደ ወገኖቹ እየሮጠ፤ የራሱን ጦር የሚቀሰቅስበት ሀቅ መፍጠራችን ነው። መዘንጋት የሌለብን፤ ወገንተኛው አምባገነን ሕገወጥ መንግሥቱ ትቶልን የሚሄደው ሀቅ፤ ሀገራችን ታጣቂዎች እንዳፈር የሞሉባት፣ በጣም ደካማ የሆነ ማዕከላዊ መንግሥት፣ መተማመን ሀገር ጥሎ የኮበለለበት፣ ትምህርትና ሕክምና ባዶ የሆነባት፤ ድህነትና በሺታ የከተመባት ሀገር ናት። ይኼን መቀየር ያለብንና የምንችለው ኢትዮጵያዊያን ሆነን ስንነሳ ብቻ ነው።
ከዚህ ተነስተን አንድ ሀገራዊ ራዕይ እንፍጠር። የትግል ዕሴቶቻችን አንድ መሆን አለባቸው። ለዚህ ራዕይና ለነዚህ ዕሴቶቻችን፤ ተመጣጣኝ የሆነ አንድ የፖለቲካ ድርጅት ይኑረን። የትግሉን ሞተር የሚያሽከረክረው ወገንተኛው አምባገነን ሕገወጡ መንግሥት መሆኑ ይብቃ። መሪውን እንንጠቅና እንዘውረው። የማልክደው ሀቅ አለ። እያንዳንዱ ድርጅት የራሱን ዓላማ ለማራመድ፤ የተገኘውን አጀንዳ ሁሉ ወደዚያ ይጠመዝዘዋል። ይኼን በምንም ቀለም ኩለን ልናሳምረው የማንችል ጎጂ እውነታ ነው። አሁንም ይኼን የሳዑዲ አረቢያ ግፍ በሚመለከት፤ ለየራሳቸው ድርጅቶች የፖለቲካ ግኜታዎችን ለማስቆጠር ድርጅቶች ተኮልኩለዋል። በአነሳሽነትም ሆነ በተቀነባበረ መንገድ፤ የሳዑዲ አረቢያውን ግፍ በሚመለከት የሚቋቋም ማናቸውም አቀናባሪ አካል፤ ሁሉን አቀፍ መሆን አለበት። በዓለም ዙሪያ ካሉት ኢትዮጵያዊያን በሙሉ ያካተተ መሆን አለበት። በተለያዩ የፖለቲካና የሕዝብ ተቆርቋሪ ድርጅቶች ያሉትን ሁሉ ያቀፈ መሆን አለበት። ከእህቶቻችን ሙሉ ተሳትፎ ያለበት መሆን አለበት። ከእስልምና ተከታዮች ማካተት አለበት። ወጣቶችን ያቀፈ መሆን አለበት። ባጠቃላይ አንድና አንድ ብቸኛ ድርጅት መሆን አለበት። ተልዕኮው ደግሞ የጀዳውን የተቀጣጠለ እሳት ማጥፋት ብቻ ሳይሆን፤ ለዚህና ለሌሎችም ተመሣሣይ ችግሮቻችን መንስዔ የሆነውን የወገንተኛ አምባገነኑን ሕገወጥ መንግሥት ለማስወገድ ኢትዮያዊያን በሀገርም ሆነ ከሀገር ውጪ የሚደረገውን እንቅስቃሴ በተቀነባበረ መንገድ ማስተባበር መሆን አለበት።
ይህ አቀናባሪ አካል፤ ከወገንተኛው አምባገነን ሕገወጥ መንግሥት ክንድ የራቀ መሆን አለበት። ቀጣይነት ያለው ሆኖ፤ የተደራረበ አደረጃጀትን መሥርቶ፤ ከግለሰብ እስከተደራጀው ክፍል፣ ከኅብረተሰብ ድርጅቶች እስከ የፖለቲካ ድርጅቶች፤ሁሉን ክፍሎች የሚሰበስብበት እጆች አበጅቶና ዘርግቶ፤ መንቀሳቀስ አለበት። እዚህ ላይ ትሁትነት፣ ፈቃደኝነት፣ ፈጣሪነት እና አርቆ አሳቢነት ዋና መሣሪያችን መሆን አለባቸው። የግልና የቡድን አጀንዳ የሚያስቀድሙት ራቅ ማለት አለባቸው ወይንም ራቅ መደረግ አለባቸው። ሁሉን ለሀገሬ ሁሉን ለወገኔ ባዮችን ማስቀደም አለብን። በተለያዩ ጎራዎች የተቋቋሙ ካሉ ይዋሃዱ። የተቋቋሙው ካንድ ወገን ብቻ ከሆነ፤ ለሌሎቹ ክፍሎች እኩል ዕድል በመሥጠት፤ ማካተቻ ቦታ በመክፈት፤ ሁሉን ማቀፍ አለበት። ይህ የሁላችን ጉዳይ ነው። ይህ የሀገራችን ጉዳይ ነው።
ይህ የሳዑዲ አርቢያ ግፍ፤ ከአውስትራሊያ በምዕራብ ተጉዞ እስከ ካናዳ፣ ከደቡብ አፍሪካ እስከ ስዊድን፣ ከሀገር ቤት እስከ ውጭ ሀገር ኢትዮጵያዊያንን ያስለቀሰ ሰቆቃ ነው። ይኼ ግፍ የፈጠረውን አጋጣሚ፤ እስከዛሬ እየመጡ እንዳሳለፍናቸው አጋጣሚዎች ሁሉ ካሳለፍነው፤ ስቃያችን ይቀጥላል። ይህ በጃችን ያለ ፈተና ነው። ይህ ሁላችንን የቀሰቀሰ የሲቃ ጥሪ ነው። ይህን የተለመደ ካደረግነው፤ በጉሮሯችን ገብተው ልባችንን ዘንትለው እንዲያወጡ የፍቃድ ወረቀት ሠጠናቸው ማለት ነው። ከዚያ በድኑ ይታያል! ማን ይሆን?

Advertisements

About አንዱዓለም ተፈራ

በዐማራው ላይ እየተፈጸመ ያለው የዘር ማጥፋት ዘመቻ፤ ለዐማራው ያለኝን ተቆርቋሪነት ወደ ላይ አጡዞት፤ የምችለውን በሙሉ ለዚህ ለተዘመተበት ዐማራ ሕልውና ለማድረግ የቆምኩ ታጋይ።
This entry was posted in አስተያየቶች - Commentaries. Bookmark the permalink.

ምላሽ ይስጡ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s